政壇：肥仔明想做公關搵真銀
九月新一屆立法會選舉，白鴿黨立法會議員李華明一早話明唔選，政界亦傳佢可能想幫唐英年打江山，甚至謀個一官半職，如今唐唐喺特首選戰中落敗，泛民主派亦無望入政府，肥仔明最近就對外講九月後會籌組公關公司，一於搵真銀。
何俊仁參加特首選舉，曾被指為唐營B隊，查實白鴿黨中人不乏同唐唐關係友好，例如副主席單仲偕就被委任做西九董事局成員，羅致光亦被委任做關愛基金。肥仔明更加同唐唐老友鬼鬼，曾經大談紅酒經，不過，唐唐落敗，已話明唔撈議員嘅肥仔明都要有新發展。
據聞肥仔明近日私底下同人講，只要黨友胡志偉可以接棒佢個九龍東議席，佢就安心搵真銀。其實白鴿黨中人做公關都有先例，盧子健就係其中一個，仲發到住山頂大宅，睇嚟肥仔明都係向住呢條路進發喇。