政壇：工黨大會畀「CY」攻陷
梁振英勝出特首選舉，CY一詞潮爆全城，呢兩個英文字母原來政圈大把同名者，去年底成立嘅工黨前晚先至搞建黨黨慶大會，工黨主席李卓人仲話，工黨入面滿布CY，佢自己嘅英文名簡寫叫「CY」，秘書長譚駿賢亦係叫「CY」，所以佢哋即使高呼「支持CY」，都係撐自己啫。
除咗有CY外，工黨嘅制服尋日亦曝光，尋晚黨員個個着晒代表工黨嘅橙色制服，點解件衫畀人嘅感覺咁似曾相識嘅﹖原來同梁振英競選團隊嘅制服撞色，阿人聞言都好坦白，佢話黨員喺特首選舉前都唔敢着橙色衫，費事畀人話係「梁粉」喎。
工黨建黨無耐，最需要嘅係經費，前晚建黨黨慶大家就攞咗唔少「珍藏」出嚟拍賣，阿Cyd何秀蘭連十年前「蟻聯」嘅T恤都攞埋出嚟賣，但加加埋埋成晚都係籌得十萬元，啱啱夠錢出糧咋。