政壇：日本賞櫻煲呔震

新鴻基地產聯席主席郭炳江、郭炳聯同人稱「肥龍」嘅前政務司司長許仕仁，日前被廉署高調拘捕。巧合嘅係，早前因接受富豪海陸空款待而被廉署調查嘅煲呔曾卻突然休假六日，連海南島一年一度嘅博鰲論壇都唔去，轉過頭，更有煲呔曾去日本賞櫻花嘅消息傳出，眼見身邊嘅「曾朋友」相繼落難，煲呔曾仲有閒心去賞櫻？廉署之火隨時燒到佢嗰疊，賞櫻只怕會賞到騰騰震！

他朝君體也相同

煲呔曾早前先被踢爆○九年同金融界立法會議員李國寶坐私人飛機去日本賞櫻花，話咁快又食髓知味，不過，今次佢唔敢再用商務客位價錢去坐億億聲嘅超豪私人飛機，但頭等又唔捨得坐，惟有自己出錢坐商務客位，上機當日，就有人目擊佢喺機場候機室等候上機，當時木無表情。我哋問過特首辦，佢哋就話唔清楚煲呔曾去邊度玩喎。

賞櫻本嚟好風雅，但如果心情忐忑、甚至憂心忡忡、惶恐就嘥氣兼嘥錢。好似煲呔曾正面臨廉署立案調查，七月一日卸任後更未有容身之所，加上身邊嘅「曾朋友」相繼落難，就連佢○五年力邀重返政府做政務司司長嘅肥龍都被廉署拘捕，諗起自己「他朝君體也相同」，係賞櫻花定抱櫻騰騰震感懷身世都唔知囉。

肥龍被廉署拘捕，同煲呔曾關係密切嘅唐英年又喺選戰中大敗，仲因為僭建地下王宮畀屋宇署調查，分分鐘因為僭建與圖則嘅先後問題惹上官非，新朋舊友都一身蟻之餘，種種事例亦顯示煲呔曾領導嘅夕陽政府連爆官商勾結醜聞，愈揭愈多且愈爆愈臭，事件燒到煲呔曾頭上都絕唔出奇，貪字最終都係得個「貧」。新政府上場相信亦係撥亂反正嘅好時機。