東方高舉龍泉劍 斬妖除魔不手軟

大快人心事，正義又告捷！東方報業集團追緝網上誹謗貼文幕後黑手，再下一城，證明「犯東方者，雖難必誅」唔係口號咁簡單，而係坐言起行，所有向正義傳媒施放暗箭嘅牛鬼蛇神必定會受到應有懲罰！

東方早前入稟控告「獨立媒體」網站兩篇分別登於○七及○九年嘅文章誹謗，原訟庭尋日判東方勝訴，被告除咗要向東方賠償十萬元，仲要支付東方訟費。法官更責令被告提供發放誹謗貼文嘅網民個人資料，包括姓名、住址及電郵地址。

叮！多行不義必自斃，網站知法犯法，縱容網民誹謗，最終受到懲罰，完全係罪有應得。正如律師黃國桐話齋，法庭今次裁決清楚話畀網民同網站管理人知，唔好以為喺網上「睇我唔到」、「搵我唔到」就可以亂講嘢，講完乜事都冇，其實最終一定走唔甩。佢仲指出，網站為毫無事實根據嘅誹謗文章提供平台，難辭其咎，法庭完全可以判重啲。

事實再一次證明，自作孽，不可活。有人以為喺網上發放誹謗文章，就好似匿埋陰暗角落施放冷箭一樣，神不知鬼不覺，可以逍遙法外。其實，若要人不知，除非己莫為，所有惡意誹謗、暗箭傷人者，都必定要為自己無恥嘅行為付出沉重代價！

唔係靠嚇o架，正如資訊科技專家話齋，「網上行為比你喺條街做嘅嘢更易留下證據」。原因好簡單，網民喺網上任何舉動都有紀錄，而電訊管理局要求網絡供應商必須儲存用戶紀錄三個月，網民嘅一言一行，一查統統現形。

話時話吖，惡意中傷東方及其管理層嘅貼文多年來喺網上陰魂不散，好明顯係有幕後黑手興風作浪。而最奇怪嘅係，流傳全球網站嘅八百幾篇誹謗貼文，中國居然佔咗七百幾篇，唔少仲係官方網站，簡直匪夷所思。今次全靠東方鍥而不捨，寧要公義，不要金錢，誓要將牛鬼蛇神一個個繩之以法。法律界人士就講得啱，東方嘅行動對社會起咗正面作用，帶出一個明確訊息：每個人都要對自己嘅言行負責。

冇錯嘞，作為正義傳媒，東方一貫講得出，做得到，剷除妖孽，不遺餘力。其實喺呢單畸士之前，東方已經成功揪出多名發放誹謗貼文嘅「高登」網民，佢哋已向東方作出賠償及刊登道歉啟事。所以話，天網恢恢，疏而不漏，如果有人認為得到庇護就可以為所欲為，逍遙法外，咁就打錯算盤喇。正邪從來不兩立，太一叮正告嗰啲幕後黑手，負隅頑抗，死路一條，無論你哋匿喺陰暗角落，亦無論你哋走到天涯海角，東方必定追緝到底，不獲全勝，決不收兵，叮！