政壇：政商定格：謝太爆黃玉山教改黑手

外界傳出支持梁振英嘅港區全國人大代表黃玉山有望出任教育局局長，但隨即引起業界反響，質疑佢當年有份同時任教統局常秘嘅羅范椒芬一同推動教改，搞到班教師叫苦連天。

由香港學者協會舉辦嘅「香江學者計劃」尋日舉行啟動禮，黃玉山同現任教育局常秘謝凌潔貞都有份做主禮嘉賓。原本唔打算致辭嘅謝太忽然爆料，話黃玉山係文憑試嘅「幕後黑手」，因為佢當年係課程發展議會主席，有份制訂新高中課程。

謝太原意係想讚賞黃玉山嘅，但畀啲本地教師、學生同家長聽到，卻係另一番感受。會後問佢係咪支持黃玉山做教育局局長，佢即刻學精咗，以自己係公務員為由拒絕表態。至於被指係教改黑手嘅黃玉山，亦三番四次話出任局長只係一個傳說，但同時強調自己當年做課程發展議會主席，多數係同業界合作，反而同羅范椒芬交往好少喎，疑似想同羅太劃清界線！