政壇：搞搞政：「梁粉」高永文繼續逍遙拒做官

屬於「梁粉」嘅骨科名醫高永文，仕途近日看漲，盛傳佢「翻兜」入政府機會高，話係頂替周一鑊做食物衞生局局長或者醫管局主席。

不過，高醫生開腔話無意重返官場，仲話：「我性格唔啱做醫療改革，要我炒人、整頓部門，真係落唔到手。」佢仲話依家最想享受人生，閒來約三五知己品嘗潮菜，做官咁大責任，都係留畀有能之士喇！

佢話重新執手術刀後，不知幾enjoy，畀佢揀寧願維持現狀，等佢以自由身繼續做「社會大義工」。佢數吓嚟緊幾個月行程，由五月忙到十月，聽落仲忙過做大官。睇嚟呢兩個位都唔係佢心目中杯茶。

不過，同樣出身醫學界嘅現任特首辦主任梁卓偉，外界就盛傳佢想做都冇得做，可能要被迫重返學界。

梁卓偉尋晚出席工黨成立晚會時，對去留問題以「嘿！嘿！嘿！」三聲奸笑作回應，都唔知佢想表達啲乜。