政壇：白鴿羅致光話CY唔奸

新特首仲有幾個月先上場，CY梁振英成日畀人話佢「狼」、又話佢奸，同CY相識咗四十五年、當年係中學同學嘅白鴿黨羅致光澄清話，其實CY唔係「奸仔」，同學對佢印象都幾好，舊年中學同學聚會仲變成「挺梁大會」添。佢又話大家話CY奸，只係大家睇佢唔透，所以CY要流露多啲人性化嘅一面，少啲反擊力咁話。

全國政協委員阿Ann蔣麗芸就形容CY係現今世代嘅「稀有動物」。何解？皆因CY嘅言行好小心謹慎，好似佢舊年聖誕節送咗隻火雞畀CY，點知CY退返畀佢，話參選緊唔收得，所以佢話CY簡直有政治潔癖喎！

社區組織協會嘅何喜華同CY識咗成三十年。不過，佢都頂唔順話CY份人好古板，稱呼人哋爸爸仲會講「令尊翁」。佢又話CY曾經同佢講過，見到港人生活得咁鬱悶，好唔開心，佢覺得CY不妨講多啲自己嘅感受。睇嚟CY想做親民特首，要搞吓形象工程先得喇！