政壇：鬍鬚曾放假諗後路

做人最緊要知進退，好似「史上最廢財爺」鬍鬚曾咁，前排仲夠膽死高調話，搞埋份預算案就會考慮去留嘅問題。好喇，立法會前日通過咗預算案，憲報尋日就公布，佢由下個月五號開始，連續放兩星期大假，莫非佢打算搵個靜啲嘅地方考慮去留？又或者諗吓點樣破蛋而出「復活」，留番份工？

無心戀戰遲大到

鬍鬚曾喺今年二月頭上電台節目時，公然話預算案通過咗之後，就會考慮係咪留任下屆政府。回顧佢呢幾年嘅表現，經常性高估赤字、低估盈餘，令到庫房嚴重水浸，水浸都唔夠，佢仲要同佢兄弟曾貪婪一樣，孤寒成性，坐擁成萬億元儲備都唔拎啲錢出嚟幫助有需要嘅人，搞到呢幾年社會多咗一班「N無」人士，總之就係劣迹斑斑。

民望一直喺低位徘徊嘅鬍鬚曾，早幾日仲喺立法會博反彈話，大家要小心提防有人趁住政府交接，打擊香港嘅金融系統，從中取利，講到自己好有先見之明咁款。

不過佢嘅言論，傳媒同輿論完全提唔起興趣，證明呢啲只係佢自我感覺良好嘅舉措啫。跟住前日預算案三讀表決，佢仲遲大到，一副無心戀戰嘅態度，睇嚟佢終於知道自己只有「去」、沒有「留」。

下個月五號開始，鬍鬚曾就會放十四日大假，期間先後要財經事務及庫務局局長陳家強，同埋發展局局長林鄭月娥幫手做替工，搞到亂晒大龍。實情鬍鬚曾仲有乜嘢好諗呢？相信佢都冇得留低，只要諗吓七一後去邊度住、有乜嘢做咪得囉！