曾商勾結種惡果 油魔肆虐民生苦

通脹高企，搵食艱難。試諗吓，如果營運開支一季內急升幾成，你話點頂呢？

近排油氣價格急升，十幾個新界的士團體尋日去新政府總部請願，要求引入燃氣附加費，幅度根據車用石油氣價格釐定，每程收一至兩蚊不等。

本來呢，徵收附加費唔係咩新聞，航空、海運以及鄰近地區嘅的士業都實施過。問題係，增加收費一定會影響生意，等同趕客，如果唔係迫於無奈，相信的士團體都唔會出此下策。

事緣機電工程署前排公布，四月起調高車用石油氣售價，足足比三月份升咗一成二，今年首季累積升幅接近四成，創咗歷史新高，唔怪得的士業界叫苦連天！

石油氣價格升完又升，高處未算高，的士業真係一殼眼淚㗎。業內人士話，石油氣開支佔咗經營成本三分之一，而車行近排仲頻頻加車租，內外夾擊，的士車費又原地踏步，隨時連本都蝕埋。

車租、燃氣冇得慳，收入大幅縮水，司機大佬惟有節衣縮食，勒緊褲帶。有司機團體怒斥當局袖手旁觀，漠視佢哋搵食困難，揚言要發起堵塞道路、罷駛行動抗議。

其實，近年國際油價不斷攀升，受影響嘅點只的士行業，整個運輸業界都冇啖好食。係人都知，本港油價一直被油公司壟斷，加快減慢，加多減少，運輸業深受其害，苦不堪言。最弊當局鋪鋪都以自由市場做擋箭牌，唔監唔管，偏幫大財團出晒面，對運輸業嘅困境視而不見，任由油魔肆虐。

話時話，油魔無王管，運輸業界在商言商，冇可能做蝕本生意，羊毛出在羊身上，最終咪又係普羅市民受害。所以話，近年油價飆升，通脹惡化，百物騰貴，罪魁禍首就係「曾商勾結」嘅煲呔曾政府，叮！

冇錯，夕陽政府就快壽終正寢，但係唔好以為咁就可以關人個關。石油氣價格失控完全係「曾商勾結」種下嘅惡果，咪話太一叮唔提醒，當局仲唔盡快採取措施回應業界訴求，將功補過，一味諗縮數將爛攤子留畀下屆政府，因住遺臭萬年呀，叮！