SUN世代：化妝紅人 轉型無界限
小伙子一飛沖天，需要的是踏出第一步的勇氣。嚴祖耀（CY Yim）跳入化妝界由零開始，靠實力打響名堂，短時間已躍升為新進紅人化妝師，近年更作出新嘗試，升呢為形象總監及電影美術指導。他肯搏、肯試，敢於踏出新一步，踏上成功路，印證成功不會自動送上門，需靠拿出勇氣搏回來。
二○○三年，對香港人來說是難忘的一年，對CY亦然，這一年是他人生的轉捩點、重新出發的第一步：「沙士嗰年我喺醫院做文職，試過一個N95口罩戴足三日，有人知我喺醫院做，仲歧視我添！」為了擔起頭家，CY年紀輕輕已投身社會：「中五時父母分開咗，我有責任要照顧屋企，所以好早出嚟做嘢，好好彩搵到醫院嘅文職做。」
怕醜仔不愛與人溝通，但醫院工作講求團隊合作精神，改變他的性格，學懂與人溝通。在醫院度過四個寒暑，沙士一「疫」令他明白人生苦短，必須把握時機：「醫院人工高、福利好，但二十五歲嗰年，我開始思考未來，諗吓係咪想咁落去！」
結果，CY決心跳出來，轉型重新出發。有勇氣向前走，但究竟要朝哪個方面發展？最後他決定做個男化妝師：「好多出名嘅化妝師都係男人，好似阿Zing，男化妝師好有前景！其實我揀做化妝，都係因為前女友，佢都係讀化妝，每日會問我，佢個樣有乜唔同，其實男仔點識答，慢慢我發覺化妝都幾得意，幾有興趣，於是就讀化妝。」
肯搏肯試 升呢美指
由零開始，男子做化妝絕非易事，CY亦曾有過不少蝦碌事：「我試過將唇彩當眼影，又試過將眼睫毛液篤入眼！」
幾經苦練，終於學滿師畢業，首年的化妝生涯絕不易過，不過他未有放棄：「頭一年工作量唔多，我無嘢做會研究啲新妝！好彩恩師Gary Chung介紹好多工作畀我，我總算比同期同學順利。」
經過不斷的努力，CY由寂寂無聞的化妝師，躍升為新進的紅人化妝師。突然走紅，他未感到自滿，反而不斷挑戰自己：「前年年尾有個計劃，搵我做模特兒形象指導，我對着衫都有要求，覺得仲後生點解唔試吓呢。」
結果，他又踏上形象指導之路，「以前做化妝好被動，人哋叫點化就點化。形象指導要做好多前期工作，例如模特兒甫士、化妝、着衫都要做好搜集，之後仲做埋時裝騷嘅指定形象總監同舞台劇形象總監，短時間已經有咁嘅成績，真係好有成功感！」
化妝師及形象指導雙線發展，CY覺得還可以嘗試更多，一○年他自組廣告公司，踩入廣告界初嘗做老闆滋味。現時，CY正式進軍電影圈擔任美術指導，再次接受新挑戰：「有公司搵我做美術指導，我會努力，希望拎到獎項。」
CY's Profile
現職：1009 Production創作總監、Storm Entertainment Group形象總監、Diana Production美術指導
興趣：旅遊、睇書、思考
婚姻狀況：未婚
陳嘉寶早前拍攝寫真集，特別請來CY擔任形象顧問。
CY（中）表示，有今時今日的成績全靠其團隊同甘共苦，互相支持。
CY（右）與鈴木仁（左）因合作而結為好友。
CY（中）與合作過的朋友都保持着友好的關係。（受訪者提供）