清朝雍正皇帝嘅第十代嫡孫愛新覺羅燾健尋日現身灣仔，同場仲有以擅長畫魚而自成一格嘅「中國魚王」宋守友。兩人應香江文化交流基金會主席江素惠同香港富興投資總裁鄭雙慶邀請，下月二十號喺灣仔華潤大廈展覽中心聯袂舉行書畫展賣會，仲一連四日喺現場為市民作畫題字。
燾健係雍正第五子弘晝嘅後人，弘晝即係乾隆皇帝弘曆嘅細佬，而燾健嘅母親詹慶芝係中國著名鐵路工程師詹天佑嘅孫女。
燾健話佢已習字二十八年，朝朝三點起身練字，每日練足四個鐘。佢話雖然有皇室血統，但都係普通人啫！
愛新覺羅燾健（右二）現身香江，搞手江素惠（左二）同鄭雙慶（右一）應記一功。左一為宋守友。
