政壇：政商定格：工聯會強攻九西懶理西環
工聯會喺年幾前已諗好個「風車陣」，即係由「票后」陳婉嫻出戰九月立法會區議會超級議席，其餘五個直選選區亦會派人出戰。
現任立法會九龍西議員梁美芬，當日係得到工聯會之助至可入圍。據講，西環近日已開始勸退工聯會，希望佢哋顧全大局，繼續幫梁美芬助選。但工聯會認為今次選舉關乎工聯會擴大政治版圖，所以班兄弟姊妹唔想再讓畀梁美芬，佢哋仲派建造業總工會理事長周聯僑去九西參選添！
為催谷僑哥知名度，嫻姐呢排不時陪佢落區，尋日佢哋帶隊去深水埗睇劏房，僑哥不斷向在場傳媒解釋劏房問題有幾嚴重，仲要求政府盡快興建公屋，同時立例規管劏房質素，咁至保障到市民安全。
嫻姐（左一）帶周聯僑（左二）視察劏房，展開工聯會風車陣序幕。