政壇：搞搞政：大舊替補玩拉布玩殘譚志源

替補機制被剝晒大牙、將影響收到好細後，改叫立法會議席出缺安排，會喺今屆立法會任期內完成審議，各黨派對新方案嘅反應尚算正面，預料可以順利通過。但人民力量立法會議員「大舊」陳偉業就表明會繼續反對議案，佢仲已經向草案委員會主席提出幾十項修訂，一來玩拉布，二來同政制及內地事務局局長譚志源玩鋪勁。

譚志源早前曾經死撐，話方案只不過限制辭職議員喺六個月內再參選，從來冇剝削市民嘅投票權。大舊提出修訂嘅內容就千變萬化，包括將議案中嘅六個月改成五個月、四個月或者三個月等字眼，或如果辭職議員肯支付補選產生嘅行政開支，政府就唔應該限制佢參選。

大舊話由於議員提出修正案冇規定發言次數，所以佢同黃毓民兩個會好似玩接力賽咁輪流發言。毓民仲話辯論當日會要求主席響鐘點人數，等班議員可以坐定定睇住佢哋玩拉布。玩到咁盡，其他議員真係要諗吓計至得嘞！