政壇：黃家和教CY沖絲襪奶茶
候任特首CY梁振英唔止種瓜種菜叻，沖絲襪奶茶都有一手，師傅原來就係「梁營」悍將、餐飲聯業協會會長Simon黃家和，佢力證CY的確「沖得」。
外界一直揣測「梁粉」陣營將官運亨通，Simon就擰頭話冇佢份：「CY都冇搵我入政府。」但對出選立法會飲食界就會積極考慮。到底佢同CY係真熟定假熟，睇番一張陳年相，就好清楚。
話說○九年台灣風災，飲食界發動齊心賑災，Simon搵嚟當年仲係行政會議召集人嘅CY上台沖奶茶。CY用十分鐘就學識沖茶，佢拎起茶壺，沖咗杯「處男奶茶」拍賣，成功籌得一萬二千蚊。
CY（左）經師傅黃家和（右）特訓，十分鐘就學曉沖絲襪奶茶。（黃家和提供）