烽火台：港鐵掠水責任新解

話說港鐵大幅加價之際，一名蟻民與奸商展開激辯──

蟻民：車禍啊車禍！地窿鐵路發生重大車禍！

奸商：大膽蟻民，危言聳聽！地窿鐵路雖然事故頻頻，但至多停駛幾句鐘，幾時發生過大車禍？

蟻民：喂，我哋蟻民做生做死，人工加得雞碎咁多，你個地窿鐵路一年狂賺一百四十七億元，依然要落井下石瘋狂掠水，請問係咩道理？整體車費喪加五個幾巴仙，搞到幾百萬乘客荷包重傷，流血不止，可見加價為禍不下於事故，係另類車禍！

奸商：條數係咁計嘅。因為地窿鐵路舊年加價導致狂賺，所以今年必須再接再厲，明年再加多啲，未來就再搵多啲，一路加加加，一路賺賺賺，構成財源廣進嘅良性循環，嘻嘻……你連咁簡單嘅道理都唔曉，人工加幅梗係低過車費啦！

蟻民：地窿鐵路見錢眼開，不顧社會責任麼？

奸商：咁就睇你點樣理解「社會責任」咯。喺奸商眼中，政府提供補貼同土地發展權，我哋卻之不恭，年年大幅調高車費，亦係理所當然，所謂社會責任者，責在社會一方，一句講晒，社會係有責任保障地窿鐵路賺大錢嘅。

眼見蟻民無言以對，奸商頓然張開血盆大口：哈哈，蟻民即係蟻民！勸你低頭認命，乖乖進貢奸商，一世捱窮啦你，哇哈哈……