黑灰白：港鐵車廂對話

──使乜咁勞氣噃，選誰出嚟有乜嘢分別啫？你慌贏嗰個會掂地產商一條頭髮咩？地產商投另一個又點呀？到時到候大家就埋堆㗎啦。呢個世界講錢講權講勢，共產黨撐你，地產商就撐你；地產商撐你，共產黨都唔會點出聲。天下烏鴉有白嘅咩？

──咪咁大聲講住！用啲咁嘅激將法，激到人真係去剃光地產商個頭，大搞共產主義嗰陣就你同我都唔得掂。個人連共產黨都話唔住，分分鐘共產黨唔搞共產佢要搞都做得出，上邊重慶有辦你睇啦，總之呢幾年大家都有排捱啦。

──咁樣贏都唔光彩啦！自己咪一樣有醜聞，收得密啲之嘛。唔知點解，我先前都覺得無乜所謂，但係共產黨一企出嚟死撐，連停一停想一想都話唔畀，我就當堂火都嚟埋，急急趕去投白票。有冇用都好，總之就係條氣唔順。

──我起初都以為上邊係咁意畀我哋搞吓民主選舉都幾好吖，中國終於開放咯噃。卒之臨門一腳都搞出一鑊粥，佢有佢話順利選出，我哋有我哋話大石壓死蟹。依家我睇睇吓二世祖都唔係衰得咁交關，起碼最後幾日都做番場好戲。

──呢次咁搞法，上邊真係得不償失。經過呢次，我對上邊已經冇晒信心，對你講乜都假，到頭來乜嘢都係佢話番晒事。我表哥落咗嚟無耐，一直叫我咪信共產黨，我仲話佢固執偏見，點知佢重靈過黃大仙同車公。

──嗰啲政黨真係冇鬼用。十幾萬人叫佢哋唔好投都唔聽，淨係識聽上邊支笛，當我哋死嘅。個班土共今次現晒形都好，大家揭晒底牌，下次選舉就咪選佢哋，選番長毛囉。特首得一個，議員有幾十個，上邊封殺得幾多？睇吓你上場惡得幾耐……

上述對話，錄自港鐵擁擠車廂之內，其後兩中年男子下車，不知最後有何結論。