港府良心也外判 工友逼入枉死城

清潔工人溝錯清潔劑，炸死女工友；安全繩突然鬆脫，剪樹工人從高樹墮地而亡；防衞設備簡陋，保安員死於懷疑精神病人嘅狂刀之下……如果話工友死得冤枉，太一叮絕對同意；如果話受害人純屬死於意外，咁就值得商榷嘞，事關佢哋其實係畀港府疏忽誤殺。

點解咁講？第一，連串事故嘅遇難工友原來都係受僱於政府嘅外判公司。第二，港府對外判商疏於監管，職業安全守則變成一紙空文，外判工人唔出事至奇！港府不殺工友，工友因港府而死，話港府疏忽誤殺，已經客氣咗，嚴格嚟講，港府根本就係連串奪命個案嘅真正元兇！

嗱，根據工會組織統計，過去一年就至少有十五名政府外判工喺開工期間死亡，即係平均每個月都有至少一名外判工友無辜賠上性命，上個月可能係房委會保安員，今個月可能輪到康文署花王，下個月又輪到食環署清潔女工……外判工友個個月被迫參演《死神又來了》，港府只係當睇戲咁睇，無動於衷，何止疏忽，簡直冷血！

話港府係「無動於衷」，無誇張o架，事關佢哋真係鐵石心腸，踢都唔郁。唔係咩，外判工人月月送命，港府作為最高僱主，竟然翹埋雙手，乜都唔做，政府合約訂明，外判商必須遵守職業安全規定，家陣外判工友事故不斷，有幾多外判商受懲處呢？又有幾多外判商被終止合約呢？答案係：少之又少。

喂，人命關天，如果工人出事都唔使罰，外判商梗係大安旨意，對工友嘅職業安全闊佬懶理啦，如果唔係，都唔使喺合約白紙黑字訂明啦。港府有例不依，監管不力，咁同縱容外判商漠視工人安全有乜分別？

咁啦，如果港府唔想再做殺人兇手，一定要撥亂反正，外判合約唔係一味價低者得，仲要加入工傷意外率指標。嗰啲罔顧工友安全嘅無良僱主，一律列入黑名單，殺一儆百，睇吓仲有邊個敢逼工友入枉死城！

唉，講番外判工人，多年來唔係被壓榨薪金，就係職業安全無保障。好多人都話，港府外判嘅，唔止係工程合約，仲有責任同承擔，計太一叮話齋，港府直頭連道德同良心都外判埋啦！煲呔曾自己都掛住同富豪飲飲食食、勾勾搭搭，外判工死活仲邊有人理吖？

各位高官，係時候改過自新嘞，七月政府換屆，禮賓府換主人嘞，因住你哋個位隨時都被外判埋o架，叮！