政壇：搞搞政：鐵頭仁76票厚顏唔認衰
特首選戰落幕，政圈中人唔少都覺得一切係意料中事，不過，白鴿黨何俊仁（鐵頭仁）只得七十六票，就引嚟好多議論，有啲市民明白係泛民投白票同杯葛選舉引致，亦有啲人覺得既然有近二百提名票，點解佢哋又唔投票。點都好，鐵頭仁一啲都冇難過，仲話「唔覺得攞七十六票係件醜事，因為冇諗過會贏！」
鐵頭仁年前遇襲、頭部受傷，因此得到個鐵頭仁嘅花名，今次低票收科，一樣無損心情，唔通練咗鐵面功？記得選舉完咗之後，鐵頭仁一副激昂嘅神情批評當選特首嘅梁振英（CY），話佢係「三低特首」，不過，尋日佢都畀人質疑七十六票會唔會少咗啲？
鐵頭仁喺某個電台節目中解釋，參選以嚟，由始至終佢都冇諗過會贏，而且今次參選亦唔係為咗選票，所以唔覺得攞七十六票係件醜事喎，呢啲到底係睇得開定係心理質素太強呢？
設計圖片及對白