政壇：葉劉返佛山練葉問神功
特首選戰塵埃落定，全城關注嘅焦點係下屆政務司司長（CS）職位誰屬，發展局局長林鄭月娥同新民黨主席葉劉淑儀都被傳係疑似人選，葉劉連日大打開口牌，日前仲開出條件，講明唔會做「妹妹」林鄭嘅下屬，不過，事情嘅發展卻傾向於「好打得」嘅林鄭被看高一線。葉劉唔夠打，早前就返咗家鄉佛山南海一趟，到訪「一代宗師」葉問紀念館，一見木人樁就即時葉問上身，唔通佢想學吓點樣先可以更好打？
葉劉日前喺facebook開個名為「佛山考察團之葉問上身篇」。今次葉劉仲返到祖屋探望，又去到劉氏大宗祠睇吓，原來佢上次回鄉已經係一○年。有網民留言，提醒葉劉佛山祖廟嘅北帝好靈嘅，莫非佢想叫葉劉去拜神，祈求仕途心想事成？