政壇：G4傍實CY冇得落區謝票

特首當選人梁振英（CY）當選翌日就走訪多個地方，結果有人質疑佢口講爭取市民支持，卻冇第一時間巡遊各區向市民謝票。據可靠消息講，其實CY唔係唔想落區，而係依家出出入入都要有警察傍住，而警方又以保安理由，唔建議佢落區謝票。

負責保護政要人身安全、俗稱「G4」嘅警方保護要人組依家已經貼身保護CY，安保工作亦力求滴水不漏，消息話，CY一度考慮用番競選期間嗰部宣傳巴士落區，向市民致謝，但警方卻認為咁樣好唔安全，如果一個唔覺意引起混亂，搞到CY有乜損傷，佢哋真係擔當唔起。

近年示威愈來愈激烈，G4有咁嘅顧慮都可以理解，何況CY部宣傳巴士係開篷嘅。如果有人掟佢、甚至用攻擊性武器，安保的確係大問題。據講CY陣營亦明白警方嘅憂慮，所以唔堅持要做謝票活動，CY尋日接受電台訪問時就話，希望遲啲市民對佢嘅興趣無咁大時，可以減少保護人手，等佢真正做到親民嘅特首喎。