政壇：黃家和被屈冇畀遣散費
餐飲聯業協會會長黃家和（Simon）捲入一宗勞資糾紛，有匿名市民報料，話之前喺大埔富亨邨結業嘅連鎖茶餐廳「大排檔」拖欠員工遣散費，不滿該店老闆Simon之前喺報紙度大大聲講，會按法例賠足畀員工，話佢講大話。不過，我哋經過一輪查證後，原來Simon被人屈，佢對事件感到好無奈，唔知係咪因為選舉問題被人惡意攻擊。
我哋搵過Simon了解，佢話大排檔二月一號正式結業，共遣散九個員工，一切賠償已經喺本月十三號至二十二號期間畀晒，尋日仲特登叫會計部同事問清楚每個遣散員工收到錢未，有七人已表明收到錢，餘下兩人因為未查銀行戶口，所以未知收到錢未。不過，最奇就係投訴人事後又回覆我哋，話佢已經收到錢喇，既然咁緊張賠償，點解唔查清楚銀行戶口先呢？
黃家和被投訴拖欠遣散員工補償，但查證後原來係被屈。（資料圖片）