政壇：唐唐大意失特首

特首選舉塵埃落定，挾城中大富豪同商界瞓身力撐嘅唐英年由本來被認為單手應戰都打贏，變成大輸家，可以話演繹咗香港選舉史最勁嘅「滑鐵盧」戰役！不過，一本舊年十二月出版嘅運程書，早喺幾個月前已經預言梁贏唐輸，當時唐英年陣營要人有人、要財有財，本書卻批唐唐參選必「眾人皆醉 須防大意失荊州」，結果，唐唐同佢嘅星級班底果然衰咗，未來係逐鹿政圈定係被放逐，真係無語問蒼天囉！

CY順應官運登頂

呢本由堪輿界人士袁御庫編寫嘅二○一二年流年自救手冊嘅運程書喺舊年十二月出版，書中除咗國運港運外，仲預測咗特首選舉結果，袁師傅喺書中話，佢同CY及唐唐都有一面之緣，感覺CY果敢，唐唐圓滑，兩個人都係大將之才，但袁師傅對梁振英嘅命理批示係「順應官運 領導抬轎佔鰲頭」，話CY運行丁丑，此命以丁、甲為用神，踏入四十九歲後用神最真，今年更進入最佳官運之時，且一二年申子會自身三合一次，再在流年壬辰年之辰三合一次。袁師傅預言：「料北京當權者兩人齊撐，前後抬轎般抬上香港最高權力機關，但需小心被男性朋友出賣」。

咁唐唐又衰乜呢？批語係「眾人皆醉，須防大意失荊州」，袁師傅話，唐唐係大富豪之命格，一生無憂，大運從○二年開始扶搖直上，佢嘅作風亦係敦厚圓滿。不過，現階段（去年十二月）看似順風順水，惟身旁阿諛奉承者眾，因此眾人皆醉，如不能及早發現及對應問題，時機一過，只怕恨錯難返！

睇番特首選戰嘅發展，就知道呢個預言實在好準，如果唐營喺感情缺失、僭建風波兩宗醜聞爆出後，用誠懇、認真嘅態度拆彈，而唔係閃閃縮縮、一陣「挖深咗」，一陣又攞個老婆出嚟擋箭，自此唐英年就畀定位為「冇膊頭、冇腰骨」嘅人辦，積重難返最終咪恨錯難返囉，唔知唐營賽後檢討有冇咁嘅自省呢﹖