醫局又斷錯症 老翁白捱一刀

古人話「醫者父母心」，可惜喺今時今日嘅香港，一早冇呢支歌仔唱嘞，尤其係公立醫院，事故頻頻，何來有父母心吖。

話口未完又出事喇。今次受害者係八十七歲嘅病人莫伯，佢今年一月因為肚痛未能排便，家人陪佢到大埔那打素醫院求診，食藥後病情未見好轉，被院方轉介到北區醫院醫治，點知噩夢就此開始。

北區醫院幫莫伯照過Ｘ光後，一口咬定莫伯條腸穿咗，流出糞便，又話唔即時做手術分分鐘有性命危險。既然醫生講到咁嚴重，病人惟有拿拿臨簽字做手術喇，點知做完手術之後，先至發覺院方可能擺烏龍，即係話病人條腸根本冇穿到。醫護人員仲同病人家屬咁講，「好彩就冇事，唔好彩就捱咗一刀。」你話係咪冷血吖！

試諗吓，病人一把年紀，加上五年前曾經中風，出入都要輪椅代步，依家仲要無端端白捱一刀，留低一條八吋長嘅疤痕，老人家點經得起咁嘅折騰呢？大吉利是講句，醫院根本就係草菅人命，叮！

醫生斷錯症已經匪夷所思，點知院方企硬唔道歉、唔賠償，仲堅持病人臨床病徵同腸道破穿情況脗合喎。事實證明，病人條腸冇穿冇爛，咁唔係斷錯症又係乜？而更離譜嘅係，院方唔賠償不特止，醫療費用仲要由病人自己支付，呢個究竟係乜嘢世界嚟㗎！

或者可以咁講，喺醫管局眼中，斷錯症只係濕濕碎，不足掛齒。咁又係嘅，公立醫院事故不斷，開錯刀、輸錯血、打錯針、落錯藥等等，五花八門，無奇不有，佢哋又點會將斷錯症放喺眼中吖。老實講，今次病人可以執番條命，直情要開香檳慶祝添吖！

所以話，哀莫大於心死。香港醫療經費年年增加，醫療設備一流，醫療技術區內首屈一指，點知喺食衞局局長周一嶽等醫療庸官管理之下，搞到公立醫院烏煙瘴氣，亂七八糟，睇見都眼冤，私家醫院都係每況愈下。難為港府仲吹水話要發展乜嘢醫療產業喎，真係笑死人。

上樑不正下樑歪，煲呔曾成日傍住富豪周遊列國，黐飲黐食，歎到最後一分一秒，周一嶽有樣學樣，渾渾噩噩，得過且過，醫療事故頻頻又有乜嘢出奇吖。

嗱，新特首已經誕生喇，煲呔曾即將執包袱走人，記得帶埋周一嶽齊齊消失，千祈唔好留低呢舊垃圾害人吖，叮！