SUN微博：打橫嚟講：唐小朋友，夠薑企出嚟！

唐唐小朋友：不要哭，你大個仔的了！

你落敗，應係件開心的事，你大可以難過，但不必悲傷，毋須滴淚，因為，就算畀你「低票」、「低能」及「低聲下氣」之三低情況下當選，以你的能耐，在香港呢個咁多深層次矛盾仍未解決的時刻，你根本就做唔嚟嘅！為了自己、為了香港、為了七百萬人，你輸咗，真係大家都好，天佑香江呀！

你出戰特首，唯一的得着，係你媽咪想你光耀門楣啫！其實，由此小圈子黑手扶植出來，有幾光榮啫！嗱！你話過，在哪裏跌倒，就從哪裏站起來！所以，你好趁呢五年，洗底做人，戒酒戒色戒口吃，真心親身落區，體察民間疾苦，唔好再靠公關或屎片醫生供稿唸讀，噏完都唔知自己講過乜！並要實現對港人的承諾，於二○一七年，爭取一人一票普選特首，反正，依家，你所有「醜聞」都曝晒光（喂！應該再無黑材料啦嘛！）清清白白上路，贏回尊嚴返嚟，讓媽咪安慰同有「飛史」！

嗱！今次，見識過政治的陰險後，唔好再吊吊揈啦！先填番個氹，兼用功替港人𥄫住振英的所作所為，幫香港人發聲，推動民主，落實港人治港（雙普選），分分鐘可以繼為「香港民主之父」（即「民主繼父」也好），但係，對你來說，五年實在太長遠了！不如今年九月，先參選立法會，從低做起，你願意嗎？我睇死你廢柴又無膽，都係喊三聲罷啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府