政壇：政商定格：鄭志剛忙學習等升職
中華總商會青年委員會等六個商會嘅後生仔女日前搞咗場聯歡晚宴，身兼全國青聯副主席嘅新世界發展第三代接班人Adrian鄭志剛都現身撐場。佢着住深咖啡色圓領T恤配襯淺灰色牛仔褲，再加件淺色西裝，同鍾意着波鞋襯西裝嘅爺爺鄭裕彤，一樣盡顯個人風格。
當晚Adrian短暫現身，儀式後就急急腳離場。佢喺月初升任集團聯席總經理，同接任主席職位嘅爸爸鄭家純齊升職，自然忙得不可開交。佢話最近忙緊學嘢，謙稱仲有好多嘢要學喎！
現場仲有好多靚女，包括潮州商會青委副主任林月萍、蔡敏思等。腹大便便嘅中華廠商聯合會青委主任顏明潤話月底就生得，今胎又係囝囝，決定生完就收工。
全國青聯副主席鄭志剛（中）同陳仲尼（左）都嚟撐場。右為活動籌委會主席張宏基。
潮青美人圖，前左起：林月萍、林淑怡；後左起：蔡敏思同黃仰芳。