今個月二十號，CY梁振英仲係特首候選人身份時去過立法會新大樓，出席西九設計比賽事件專責委員會研訊，嗰次佢留咗喺新大樓四個幾鐘，全程乜事都冇。但尋日佢再以候任特首身份去新大樓，只係匆匆留咗二十分鐘左右，佢走咗之後半個鐘，新大樓就爆水喉，一爆就爆咗個幾鐘，搞到新大樓冇水沖廁。又會咁啱嘅？莫非新官嗰幾把火勁得滯？
好彩水務署即刻派人到場緊急維修，到晏晝四點半鐘左右就修理好，恢復供水。話時話，CY下個月又會去新大樓出席西九研訊，唔知到時新大樓會唔會有乜頭暈身㷫呢？