政壇：肥媽同CY炮製特首飯局

候任特首CY梁振英嘅各界支持者當中，包括來自演藝界嘅「肥媽」Maria Cordero，原來兩人好有淵源。肥媽尋日接受電台節目訪問時透露，佢同CY相識於飲食節目，講開先至知原來大家當年都在西環長大，同樣喺屋企穿膠花，而CY父母買嘅第一層樓，係佢同媽媽睇咗十幾次而冇錢買嘅一個堅尼地城單位，當時市值二萬二千元，所以感覺好親切。

同CY同年出生嘅肥媽話，正因為大家以前都係咁捱出嚟，所以成為好朋友，到後期仲發現大家都好鍾意種嘢，不時交換種子及交流種植心得，而CY知佢係葡國人，去開葡國都特登買啲生菜種子送畀佢，因而建立咗一份友誼。主持人問佢會唔會同CY慶祝，佢就話可能要過一排等CY冇咁忙先得，或者大家約埋煮餐飯慶祝吓，到時咪變咗一餐特首飯局？

如果CY畀錢買餸，驚唔驚被人話係利益輸送呢？肥媽就好大聲話：「煮飯都有利益輸送？唔啱咪我整味鹹魚蒸肉餅囉，炒素菜都得啫！」