保皇黨放生貪曾 與民為敵必自斃

立法會自廢武功，居然否決引用權力及特權法調查曾蔭權接受富豪款待醜聞，簡直冇天理。保皇黨罔顧民意為曾爵士保駕護航，廉潔及法治名存實亡，唔怪得本港喺國際廉潔度排名不斷插水咯。

「香港第一貪」煲呔曾自從被本報獨家踢爆成日傍住富商黐飲黐食，曾商勾結醜聞爆完一單又一單，現代和珅形象深入民心，誠信同品格早就破產，可以話喺政治上已經被判「死刑」。點知保皇黨與民為敵，置公義於不顧，公然放生大貪官。不過咁，人在做，天在看，佢哋遲早要付出政治代價，九月立法會選舉，選民自然會對佢哋作出懲罰嘅喇！

正如有立法會議員話齋，反對查貪曾嘅議員根本冇反映民意。其實，大部分市民，尤其係公務員對煲呔曾所作所為非常憤怒，佢對人嚴待己寬，爆出醜聞後仲毫無悔意，死唔認錯，根本就係與民為敵。

有立法會議員就講得啱嘞，煲呔曾上任時話要「玩鋪勁」，以為佢會大力推行政制改革，誰知會錯意、領錯情，佢玩得最勁嘅原來係以權謀私、接受富豪款待。煲呔曾「只許州官放火，不准百姓點燈」，一般公務員收受少少利益又拉又鎖，佢自己公然接受富商款待，一句「問心無愧」就當冇事發生，咁唔係雙重標準又係乜吖！

煲呔曾「貪遍省港澳，歎盡海陸空」，貪得無厭，大小通吃，傍住富豪黐飲黐食黐遊艇黐飛機仲嫌唔夠，連跑步機、肥雞同菜心都唔放過。正如有議員話齋，呢啲行為明顯係瀆職，令公務員蒙羞，咁嘅貪官早就應該謝罪落台喇。

多行不義必自斃，煲呔曾貪腐成性，淪為喪家之犬係咎由自取。魯迅先生曾經用「落水狗」形容敵人，呢種狗上岸之後會重新狂吠咬人，或者「至少會濺人一身污水」，絕對唔可以放過，必須痛打之。

今日放生落水狗，他朝妖孽必重來。貪曾誠信破產，佢戀棧權位拒絕辭職不特止，仲趁特首選舉亂局渾水摸魚搞小動作，轉移視線，負隅頑抗。計太一叮話齋，對呢隻落水狗必須繼續痛打，唔可以姑息養奸，既然引用權力及特權法嘅動議被否決，不如索性啟動彈劾程序仲直接喇！