政壇:政商定格:李天穎撐世姪女首飾店
新鴻基地產非執行董事郭炳湘嘅太太李天穎,尋日現身中環擺花街嘅樓上首飾店「The 9th Muse」,原來間舖係世姪女、陽明山莊發展商僑福企業創辦人黃週旋孫女Charlotte黃采笛同朋友合資開設,郭太對後生女嘅審美眼光讚不絕口。
Charlotte嘅媽媽、食物回收機構「膳心連」創辦人黃林碧瑢都喺度,佢同郭太相識近三十年,兩人經常一齊拍住做善事。郭太好似熟客咁行咗個圈,指住陳列櫃一條黑白藍三色珠鏈話,日前已買咗一條送畀囡囡。未幾佢又被美國名歌手Lionel Richie囡囡Nicole Richie設計嘅黑超吸引,即場貪靚試戴,心情勁靚。
Charlotte話自從喺美國學成歸來後,就同好友張婧一齊創業,蒐集世界各地別具風格嘅配飾或家居用品,仲有名家設計飾品。
郭李天穎(中)出巡購物,力撐世姪女黃采笛(左),右為張婧。
郭太送畀囡囡的黑白藍三色頸鏈。