政壇：搞搞政：譚志源拍心口投票冇手尾
後日係特首選舉投票，講明係暗票，即係冇人知選委投乜票，但政界一直流傳中央會出盡高科技方法，知道選委投咗畀邊個。白鴿黨議員涂謹申就建議政府，應該喺投票間加設天花板，等人偷拍唔到，另一個方法就係將票箱變成夾萬，就算有特工要撬開票箱驗指紋都冇咁容易。
唔知係咪聽到阿涂咁講，政制及內地事務局局長譚志源即刻走出嚟澄清，向一千二百名選委大派定心丸。佢話政制局唔係拍緊CSI（滅罪鑑證科），唔會拎張選票去驗指紋，亦唔會畀人咁做。佢仲話政制局會加派人手看守票箱，場內嘅閉路電視亦會扭轉方向，確保拍攝唔到，而選委喺票站內唔可以影相或交談，投完票亦唔可以逗留，相信畀人知道投乜票嘅機會係等於零。佢咁話啫，信唔信就由班選委自己決定。
設計圖片及對白