政壇：唐唐變臉涉外國勢力？

畀人感覺係謙謙君子、成日笑騎騎嘅特首候選人唐唐，早前喺特首候選人電視辯論突然大爆行政會議內容，攻擊對手CY梁振英，話CY曾喺行會講要用防暴隊同催淚彈對付示威者，又話CY提出要縮短商業電台續牌年期，CY之後已多次否認指控，但唐唐仍爆唔停，日前喺大氣電波扯白旗，都繼續爆料插人。

李國章：少少官仔脾氣

外界對唐唐「忽然勇猛」，甚至係「自殺式」嘅舉動都好多揣測。前教統局局長李國章尋日喺電台節目度話，雖然自己提名咗畀CY，但其實過往同唐唐接觸多啲，又話唐唐非常好人，唔會同人嗌交，唐唐近日所為唔似佢認識嘅唐生，懷疑佢後面啲人唔知邊個喺度教佢做埋啲咁嘅嘢，對佢唔公道咁話。

唐唐本來係「大熱」，諗住坐定粒六，點知畀人踢爆大宅僭建地庫，又有連串婚外情同私生子傳聞，搞到民望插水。李國章就話：「佢可能覺得應該呢份特首係佢o架喇，爸爸（唐翔千）同江澤民老友記，又有家底，點知咁多事爆出嚟啫。」所以唐唐會諗「我唔得你都唔得」，直言唐唐「有少少官仔脾氣囉」。李國章又話富貴黨唔投票畀CY，係小朋友嘅作風。事後，富貴黨青年團就發表聲明，話對李國章嘅言論深表遺憾，要求李國章收回佢發表嘅言論。

唔少挺唐嘅人都來自地產界，佢哋同內地嘅關係千絲萬縷，理應都唔會想唐唐去到咁盡，費事返唔到轉頭。但唐唐依家好似唔受控制，有資深嘅親中人士就懷疑背後有驚天大陰謀，話可能唐唐背後嘅力量唔止地產商，而係涉及外國勢力。唐唐話唔埋或者有痛腳喺美國人手上，唔可以唔聽話，所以要佢喺香港搞搞震。