如刀集：阿爺就是競賽小組

特首跑馬仔，今屆最神似，未入閘已有人充當馬評家，說邊個不可接受，邊個宜落重注。到了出閘，大熱門居然脫腳，等到執正韁繩，底出嗰隻已經帶離成條街，大熱門惟有靠沿途食位鬆（月爭）；到得辯論期轉入直路，知道追唔番，除了伸鞭打人，更挨身衝向隻底出馬，以期博大霧前腳踩到後腳，發生意外，第日再跑過。

跑馬有競賽小組，選特首一樣有阿爺，功能一樣，未定賽果，先看過程，入閘、出閘、沿途走位、鞍上動作等，幾十部攝影機影住，最後結果，始終要競賽小組認可；唐唐咁跑法，就算真的齊齊過唔到終點，來日重賽亦自不然要被取消資格。

兩個建制派選特首，唐唐選到跟泛民合流，本來說泛民是唐營B隊，如今反說唐唐是泛民B隊。看在阿爺眼裏，立場如此薄弱，焉能當大任。

特首選舉，要當選不是靠民調，實實際際是選委票，建制派近千票，唐拿着近四百個提名，但如此選法，無可能游說得了另外六百個選委；梁三百多個提名，阿爺一旦發功，唐營支持者便未必個個靠得住，加埋未表態的三百選委，便是有贏無輸。

唐營打選戰，顯然捉錯用神，一起步輸在民調，便只顧民調要緊，忘了近千選委都是建制派。辯論之前，阿爺還有點舉棋未定；如此辯論，或許民調好看一點，但阿爺便容易打定主意了！