《爽報》剩番半條命 淫媒政棍齊哭喪

《爽報》晚版「猝死」,淫媒多行不義必自斃,市民個個叫「爽」!

件事係咁,壹淫媒旗下免費報《爽報》尋日起停刊晚版,獻世六個月已經搵朝唔得晏,剩番半條命。最搞笑就係,《爽報》仲死撐話停印晚版係要集中火力於早版,直接與其他免費報紙競爭奪取市場佔有率,又話等早版賺到錢再搞晚版都唔遲喎。

叮!唔識嘅畀佢嚇死,識嘅就畀佢笑死。實情係,《爽報》誨淫誨盜,一獻世就淪為過街老鼠,一直「捱打」,搞到經常有大批未經翻閱嘅簇新報紙被當作廢紙出售。而更淒涼嘅係,喺自己人打自己人之下,爛果報銷量應聲大跌,自稱印數由舊年九月嘅三十二萬份暴跌到現時低見二十三萬份咋。業內人士估計,爛果報實銷數量應低於二十萬份,廣告自然隨銷量暴跌而大幅萎縮,前景真係危危乎。

正所謂,上帝要佢滅亡,必先令佢瘋狂。壹淫媒與民為敵,自以為得米,其實係自掘墳墓,去得愈盡,死得愈快。所以話,《爽報》晚版摺埋,咪係現眼報囉,睇怕早版都唔頂得幾耐嘅咋!

老實講吖,淫賤黎一向見錢眼開,如果《爽報》晚版有得做,佢又點會自我了斷,你慌唔係燒銀紙燒到肉赤,焗住斷臂止血咩。呢,壹淫媒喺台灣搞電視,喺香港搞免費報,樣樣仆直,搞到多次發盈警,連累股價不斷插水。正如學者宋立功話齋,《爽報》Cut晚版,即係發出一個真係唔理想嘅訊號。其實何止唔理想,簡直係惡劣添吖!

古人話,得道多助,失道寡助。《爽報》宣淫販賤,獻世短短幾個月,就有二十三件物品被評為不雅,奇就奇在影視處僅提出十一項票控,放生其餘十二項,而法官大人又輕輕放過,每項控罪係咁意罰款一萬元。更奇嘅係,立法會班政客居然亦自甘墮落,為淫賤黎保駕護航。嗱,前排十八個民間團體齊齊操上立法會,譴責《爽報》賣弄色情,荼毒青少年,點知平時扮晒正義嘅公民黨同民主黨政客裝聾扮啞,變晒鵪鶉,唔通邪道多助?

唉,無計啦,淫賤黎係泛民最大金主,過去分別向公民黨同民主黨捐款過千萬,仲提供私人遊艇畀呢班政客吃喝玩樂,佢哋受人錢財咯喎,又點敢同淫賤黎過唔去吖。煲呔曾傍住富豪黐飲黐食,擺明官商勾結,而公民黨同民主黨包庇淫媒,即係政淫勾結啫!

綱紀紊亂,是非顛倒,善有惡報,惡有善報,唔怪得香港烏煙瘴氣喇。不過咁,邪永遠不能勝正,《爽報》晚版執笠,已為壹淫媒敲響喪鐘,護淫政棍注定齊齊哭喪,叮!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報