政壇:建仔雙重標準無恥

建仔經常被外界批評對政府包庇護短,其實係有原因嘅,好似有立法會議員提出動用特權法調查煲呔曾貪盡海陸空醜聞,面對咁大是大非嘅問題,該黨竟然反對調查。不過,對於因為抗議替補機制假諮詢而被判囚兩個月嘅社民連議員「長毛」梁國雄,該黨竟然要求內務委員會就啟動罷免程序進行討論,意圖罷免長毛,如此雙重標準,被長毛狠批「廉恥係無得教嘅!」

長毛前日被判刑後即時上訴,依家只係保釋外出,但立法會討論罷免長毛嘅聲音開始醞釀,但不獲泛民主派支持。白鴿黨代主席劉慧卿話,一直好反對暴力,但由於長毛已受到法律制裁,唔覺得需要罷免佢。工黨主席李卓人就話長毛今次只係反對替補機制進行「封閉式諮詢」,係運用選民賦予嘅力量,如果市民唔滿意,下屆立法會咪唔投佢票囉,毋須由立法會決定長毛嘅去留。

扣孖葉都要去開會

泛民肯撐長毛,唔代表班建制派願意放生。一直視長毛為眼中釘嘅建仔,主席譚耀宗話現時未決定係咪罷免長毛,但建議先喺內會討論呢件事喎。佢咁講,咪即係想搞大件事囉!大家唔好忘記,早前建仔對貪盡海陸空嘅煲呔曾,冇打算再追究,就算有議員建議用特權法徹查事件,該黨都唔肯支持,如今打算罷免長毛,話唔係雙重標準都冇人信啦!

但長毛反而睇得好開,佢話唔會教其他議員點做法,但強調自己當日係反對惡法,並非為一己私欲,仲話如果有人要向佢呢啲一介草民開刀,市民自有公論喎。佢仲諗定後着,就算上訴唔成功要坐監,佢都會要求以議員身份出嚟開會,因為《基本法》講明冇人可以阻止議員去開會嘅,就算雙手扣住孖葉,都要繼續履行議員職責。佢又話如果坐監之餘又被人罷免,日後必定繼續抗爭,一定去立法會公眾席搞事喎!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白