議員無德兼無能 加薪一成添民怨

大家仲記唔記得，立法會議員早前要求薪酬水平同問責官員掛鈎，居然狼胎到建議加自己一倍人工，簡直係飛擒大咬！

立法會打劫市民荷包，全城嘩然，如果咁都通過，隨時一百萬人上街抗議都似，跛腳鴨政府邊敢亂嚟吖。呢，行政會議尋日通過，下屆立法會議員酬金加一成，由七萬三千幾蚊加到八萬零四百幾蚊，另外，實報實銷嘅辦事處營運開支償還款額一筆過提高兩成。即係話，議員被狠狠摑咗一巴，瘋狂加薪一倍嘅春秋夢醒。

不過咁，議員人工加幅縮水得番一成，係咪市民就冇怨氣呢？梗唔係喇。喂，港府成日都講啦，環球經濟隱憂處處，打工仔唔使成為獅子銀行一類僱主嘅開刀對象，已經算好彩，更莫講話加薪一成。民意代表脫離民眾，加薪自肥，市民點服呀！

話時話，如果立法會議員恪盡職責，為民喉舌，酌量加薪無可厚非，但事實係垃圾會烏煙瘴氣，懶蟲議員聲名狼藉，根本唔值得加人工！嗱，懶蟲議員有口皆悲，太一叮早就叮到手軟，「三點不露」嘅有、四年會期零質詢嘅有、開會一味掟蕉爆粗鬥做騷嘅有、涉嫌欺騙公帑嘅又有，連被爆求愛不遂怒炒女助理嘅都有……以咁嘅表現，唔減人工都偷笑啦，仲加人工，簡直荒謬！

更荒謬嘅係，立法會唔止冇履行職責，監督政府，反而助紂為虐，包庇貪官淫媒，收保護費都夠啦，使乜加人工吖。嗱，先講包庇淫媒，《爽報》誨淫誨盜，民間團體齊聲譴責，但平日滿口仁義道德嘅公民黨同民主黨政客居然裝聾扮啞，自廢武功。再講包庇貪官，煲呔曾傍住富豪黐飲黐食黐大屋，連串貪腐醜聞觸發巨大民怨，點知立法會拂逆民意，既冇正式啟動彈劾行動，又否決動用特權法查貪曾，咁嘅行徑點似民意代表吖，人民公敵就差唔多，叮！

咦咦咦，立法會放生煲呔曾，行會就通過立法會加人工，話唔定係要報答不查之恩喎。唉，行政、立法、司法互相包庇，同流合污，一齊貪婪，香港唔烏煙瘴氣至奇！

不過咁，立法會加薪，垃圾議員唔好開心得咁早呀。市民眼睛係雪亮嘅，你哋不分是非，包庇貪官淫媒，一定會付出代價，九月立法會換屆，隨時就係你哋被踢出議會之時吖，叮！