政壇：唐唐新金句末日創未來
瑪雅傳說話今年係世界末日，令呢個話題討論得相當熾熱，近日互聯網上就流傳咗張相，應該係中學生問三位特首候選人CY梁振英、唐唐同鐵頭仁世界末日時會做啲乜？點知唐唐就回答話：「我會珍惜每分每秒，以經驗、能力同團隊為香港創造更美好將來。」話明係世界末日，仲點創造未來呢？唐唐嘅笑料真係日日新鮮。
相對CY同鐵頭仁嘅答覆就比較正常，CY話世界末日最想同屋企人一齊，而鐵頭仁就話會照常生活，平靜咁活到最後一刻喎。對於唐唐嘅搞笑答覆，唔少網民都笑爆嘴，仲有網民揶揄佢，話唔知係咪唐媽媽冇教佢答問題前要睇清楚題目喎。不過張相係真定係假，相信仲有待查證。