政壇：搞搞政：何君堯新西腹背受敵

聽聞建仔會喺九月立法會新界西直選出三隊參選，早前曾傳出該黨副主席蔣麗芸會披甲上陣，但原來只係幌子，真正出選嘅係現任元朗區議會主席梁志祥。

最近我哋亦收到另一個消息，話部分元朗鄉事派成員同地區猛人已經決定全力為一位低調商人助選，呢位低調商人早前同一班支持者成立咗個組織，仲擔任組織嘅會長，擺明有心大展拳腳。

有政界中人分析，依家喺新界西出選嘅建制派已有工聯會加建仔一共四隊，剩餘嘅建制派選票唔多，有意加入戰圈嘅屯門鄉事委員會主席何君堯，除要面對建仔同鄉事派嘅夾擊外，如果低調商人真係加入戰團，咁對何君堯更加不利。消息話，何君堯喺啱啱過咗嘅星期日特登約咗班離島鄉紳食飯，離島屬於新界西範圍，據聞佢喺席上並冇講到選舉嘅嘢，但打好關係嘅用意就相當明顯喇。如果上述嘅選情屬實，新界西肯定就係繼新界東之後另一個極度混亂嘅戰場。