政壇：扮嘢文舌戰《海豚灣》導演

相信好多市民都去過海洋公園睇海豚表演，但喺尋日一個公開論壇上，拍過奧斯卡最佳紀錄片《海豚灣》嘅海豚保育專家李察．歐貝瑞（Richard O'Barry），就批評海洋公園困住晒啲海豚，又逼啲海豚表演，搞到佢哋抑鬱甚至有自殺傾向喎。

辯論一開始，海洋公園主席「扮嘢文」盛智文話海洋公園投放咗大量資源，去教育公眾有關大自然生物包括海豚嘅特性，仲話公園內幾乎所有海豚都喺園內繁殖，放番去大海等於推佢哋去死，更強調會定期改善水缸，務求令海豚有個五星級的家。

可惜歐貝瑞似乎唔多滿意佢嘅講法，話海豚係有智慧、有情緒嘅高等動物，唔可以將海豚當係馬戲團小丑咁舞，佢又批評話：「學校生物課教授恐龍，難道需要準備真恐龍給學生作示範嗎？」咁樣爭論真係無止境，如果海豚識講嘢，真係要問吓佢哋喺海洋公園係咪住得開心。