政壇：貪曾累老婆無家可歸

一年一度嘅花卉展覽尋日喺維園開幕，花卉展覽以「花之旅」為題、「風信子」為主題花，身處一片花海之中，心情自不然特別靚。不過，身為主禮嘉賓之一嘅煲呔曾老婆曾鮑笑薇，唔單止無上台致辭，佢除咗影相之外仲一直笑容欠奉，想必係煩惱緊佢老公煲呔曾近日嘅貪腐醜聞。

陳水扁02年都食過

自從《太陽報》同《東方日報》踢爆貪曾醜聞後，佢屈服於民意，決定退租深圳「禮賓府」，但因為佢喺香港嘅僭建「祖屋」租約未滿，所以今年七一下台後，佢兩公婆喺香港可以話無棲身之所。煲呔曾貪字得個貧，落得個無家可歸嘅下場，根本係佢咎由自取，兩公婆可能喺七一後要做露宿者。

唔少傳媒都想曾太面對鏡頭剖白一吓，但似乎心情唔多靚嘅曾太選擇沉默是金，拒絕接受訪問，就算我哋追問佢七一之後有冇地方容身，佢都頭耷耷快步走上車算數，唔通佢真係就無家可歸問題費煞思量？

開幕儀式結束後，曾太開始到處參觀各式各樣嘅花卉，可惜佢已經心煩意亂，見到咁多色彩繽紛嘅花，都唔可以令佢笑逐顏開。行行吓，佢去咗參觀一種叫做神秘果嘅植物，原來呢隻神秘果雖然味道酸澀，但食完之後半小時內，再食其他酸性水果都唔會食到酸味，只會食到甜味，神秘果因而得名。

唔知工作人員有心抑或無意，呢隻神秘果確實相當應景，依家曾太一家上下都被煲呔曾連累，佢哋真係好需要一啲好似神秘果嘅嘢，令佢哋一家毋須再承受煲呔曾嘅惡果。

我哋翻查資料，原來坐緊監嘅台灣前總統陳水扁，喺○二年參觀鹿港龍山寺時都有試食過神秘果，唔知煲呔曾會唔會學阿扁咁食吓神秘果呢？又或者會唔會好似阿扁嘅下場呢？