護士廣告吐苦水 醫局莫再得把嘴

怪事年年有，今年特別多，香港護士協會登廣告為前線員工打氣，炮轟醫管局漠視公立醫院人手不足同資源調配欠缺成效，真係聞所未聞。咁又難怪嘅，流感襲港，前線醫護壓力倍增，瀕臨爆煲，醫管局居然闊佬懶理，護士唔嬲至奇。

護士登廣告吐苦水，話就話為自己打氣，其實係對醫管局嘅無聲抗議就真。呢，只要睇吓逼到爆嘅公立醫院，就知怨氣從何而來。護協負責人踢爆，醫管局未有為流感高峰期預留額外人手及病床應付，內科病房要加床兩至三成，情況有如「第三世界國家」。

按國際標準，護士對病人比例應該係一對四至六，本港公立醫院嘅比例平時已經係一對十二，近排更飆升到一對十四至十六。夜更情況仲離譜，每個護士要照顧廿幾個病人，你話有乜理由唔做到氣都咳、人都嘔吖？

提起公立醫院人手問題，太一叮真係要叮爆醫管局個鎯鎯。公營醫療系統上肥下瘦，管理不善，資源分配失衡，管理層闊佬懶理，前線疲於奔命，醫療事故屢爆不止，而醫護流失率高企更令問題不斷惡化，形成惡性循環。

尤其近年雙非孕婦湧港分娩，公立醫院人手短缺情況更加雪上加霜。嗱，舊年護士流失率高達百分之五，創五年新高，流失逾八百人，問你怕未。難為食衞局局長周一嶽仲死撐，話護士數目已不斷增加，今年可足額招聘畢業生喎。查實新招聘嘅人手最快要七月份至到位，遠水難救近火吖，叮！

話時話，流感高峰期逼近，部分公立醫院急症室求診及住院人數已經超越沙士時期。以屯門醫院為例，內科病房入住率達百分之一百二十，有病人等咗廿粒鐘都未上到房，簡直仲衰過第三世界國家添吖！

醫護疲於奔命，最大受害者就係病人。前幾日有個中年男子帶個仔去聯合醫院求診，懷疑因為等得太耐，突然情緒激動要同醫護理論，雙方發生推撞，有護士當場受傷。

無論點都好，護士登廣告吐苦水，醫管局莫扮聾耳陳。太一叮正告呢班醫療庸官，快快增撥資源解決問題，唔好再害人害物。流感高潮未爆，醫護怒火先爆，呢把火遲早燒到周一鑊頭上嘅咋，叮！