政壇：星展周邦貴睇港劇學廣東話
星展香港零售銀行業務信用卡及私人貸款業務高級副總裁周邦貴（Ken），喺馬來西亞土生土長，但話自己係李小龍嘅忠實粉絲，細細個已經好鍾意香港。舊年佢知道調嚟香港工作後，開心咗好耐。
阿Ken鍾意香港嘅程度真係有目共睹，連出名難嘅廣東話都學埋，尋日佢仲堅持用廣東話同記者溝通，話有親切感啲喎。佢話同好多朋友都鍾意睇香港嘅電視劇，加上讀書時唔少朋友都講廣東話，久而久之佢就學曉咗聽，但喺廣東話嘅發音上，始終差啲。
其實佢嘅廣東話已進步神速，幾個月前佢識嘅詞匯唔多，形容詞主要都係「好好、唔太好」之類，見佢尋日已揮灑自如，仲識得唔少本土俚語添！
阿Ken喺馬來西亞、新加坡等東南亞地區做過嘢， 嘅工時雖然最長，但香港同事工作態度就相當積極，令佢都分外有拚勁。
