貪曾醜事傳千里 贖罪惟有即落台

香港第一貪官煲呔曾講過，佢飲香港水、流香港血。信唔信好呢？信！信佢抽緊香港水、吸緊香港血吖嘛！

煲呔曾以權謀私，貪盡海陸空，大至深圳「超豪廉租屋」，細至肥雞菜心跑步機，一律有舔錯，冇放過。「香港仔」貪婪面目原形畢露，身敗名裂係咎由自取，最無辜嘅都係香港人，呢次真係畀佢影衰晒，叮！

好事不出門，醜事傳千里。煲呔曾成日想做離岸特首，佢嘅貪腐醜聞震驚國際，家陣唔慌無人唔識佢嘞，就連散居海外嘅港人亦不齒佢嘅劣行。香港人聲討煲呔曾，大家呢排聽到耳仔出油，不如今日聽吓海外港人點樣鬧爆佢啦！

嗱，旅居台灣嘅港人蔡小姐直斥煲呔曾係涉貪入獄嘅陳水扁翻版，要求司法機關一定要徹查，還全港市民同海外港人一個交代咁話。英國華人林玉熊直斥煲呔曾「骯髒」；美國聯邦民權委員李艷紅暗寸煲呔曾黐飲黐食舔到盡；曾經喺香港工作過嘅悉尼新移民Carlos就估計煲呔曾仕途不保。

唉，煲呔曾貪遍省港澳，名臭全世界，令人唏噓嘅係悉尼寶活市副市長王國忠嘅一句話，佢話，「曾商勾結」醜聞令香港形象大打折扣！你話死唔死？你話醜唔醜？香港一向以廉潔奉公著稱，家陣聲譽蒙污，丟晒架。煲呔曾呀煲呔曾，香港人有你呢個特醜，真係與有恥焉咯！

民意昭昭，東方報業民意調查中心網上問卷調查發現，六成人認為曾貪醜聞破壞香港廉潔形象，六成半人認為佢應接受法律制裁。

係咯，煲呔曾，你又話飲香港水，流香港血，家陣香港嘅廉潔形象畀你搞到毀於一旦，你係咪應該係時候承擔責任呢？嗱，唔係叫你自裁咁殘忍，而係自動腳痛落台，以息香港民憤，以正國際視聽！

叮佢個鎯鎯，「台灣之子」權傾寶島，最終都要因貪腐罪行鋃鐺入獄啦，「香港之恥」亦係貪得無厭操守蕩然，若然畀佢逍遙法外，阿扁就真係晚晚瞓着都激到彈起身咯！

咦，國家領導人最近話喎，兄弟同心，其利斷金。散居海外嘅兄弟姊妹，如果各位希望香港好，不妨發動全球反曾浪潮吖，只要大家夠齊心，話唔定北大人真係被香港人嘅真誠打動，提早廢咗煲呔曾呢，叮！