政壇：政商定格：彤叔讚孫女婿一百分
坐正做新世界發展主席嘅鄭家純，千金Sonia鄭志雯尋日下嫁鋼鐵大王龐鼎元孫兒Paulo龐建貽，一對新人上晝十一點左右抵達君悅舉行註冊儀式，新郎新娘穿上中式禮服，Sonia身上嘅華貴裙褂好搶眼，配埋珍珠鑽石耳環、頸鏈同龍鳳鐲，排場十足。「陪嫁團」別出心裁，除十幾名兄弟、姊妹外，大妗姐更抱埋三隻由一對新人撫養多年嘅愛犬齊齊進場！儀式上，新郎Paulo朗讀愛的宣言，令新娘子感動落淚，Sonia嘅大哥鄭志剛更高歌一曲《When I Fall In Love》賀妹妹，引來掌聲雷動。
榮升外父嘅純官覺得若有所失，因為少咗個女，但多咗個女婿喎！佢又透露送上神秘賀禮。鄭裕彤就大讚孫女婿值一百分，至於恨唔恨抱曾孫，佢話：「已經有好多個曾孫，再生多幾個都無所謂！」
鄭志雯（左）下嫁龐建貽（右），兩家好登對。
彤叔對孫女婿好滿意。
榮升外父嘅鄭家純唔捨得囡囡出嫁，坦言心情：「若有所失。」