政壇：搞搞政：官場技安大合唱遮醜

舊年喺東華籌款活動獻唱一曲拉咪兼甩嘴版嘅《忘不了你》而技「驚」四座嘅食物及衞生局局長周一嶽，之後畀網民封咗佢做「官場技安」，但四方八面嘅嘲諷無阻佢對歌唱藝術嘅熱誠，尋日佢又再展歌喉啦！

話說周一鑊出席一個宣揚腎臟捐贈活動時，大會邀請佢引領一眾嘉賓合唱經典名曲《千個太陽》，仲要佢獨唱一段先。呢首歌出咗名要巨肺先唱得掂，「官場技安」唔敢逞強，唱嘅時候好明顯特登降低咗幾個key，收起晒當日《忘不了你》嘅激情同亢奮，唱到中段仲叫大家唱大聲啲，疑似想透過大合唱嚟遮一遮自己啲瑕疵位。

之不過，佢唱唱下又開始「上身」，當咗九龍公園個主舞台係紅館四面台，一邊唱一邊三百六十度轉身，意圖打動觀眾，但企喺佢身邊嘅醫管局行政總裁梁栢賢同行政會議成員梁智鴻就冇乜騷佢，只係默默睇貓紙。唔知兩人心中係咪暗盼首歌快啲完呢？