政壇：周澄「量地」盛名所累

被外界稱為「民主小女神」嘅周澄一向都話想去非政府組織、即係NGO返工，尋日佢出席海港青年商會活動，一提起搵工就大喊頭痛，皆因唔少非牟利機構睇到佢大小姐份履歷，都大叫怕怕，搞到佢搵工搵到依家都仲未成功。據佢所講，唔少機構唔係覺得佢做唔到嘢，就係嫌佢嘅知名度太高，仲話擔心如果遲啲有活動舉行嘅時候，班記者淨係識得圍住周澄採訪，搞到個活動本身冇人理就唔係咁好啦。

至於其他同NGO無關嘅工種，佢話都有試過，但人事部又係一見到佢份履歷，就認定佢係社運分子，仲會標籤佢係嗰啲淨係識搞事嘅80後，所以都唔多會考慮佢喎。不過，佢對前景依然好樂觀，話依家喺智庫Roundtable幫手做緊政策研究，間中又會喺報紙寫吓專欄，所以暫時都唔使喺屋企量地。佢仲講笑咁話，過多一陣等少啲人記得佢，就會容易啲搵到工喎！