政壇：最廢財爺睇戲等收工

煲呔曾捲入貪腐醜聞同特首選舉劇情愈爆愈燦爛，益咗財爺鬍鬚曾，往年佢發表預算案之後定必畀社會狂插聲討，今年就唔同，就係因為有兩齣好戲上演緊，分散咗市民嘅注意力，佢樂得清閒，尋日喺網誌度晒命，話自上星期一連出席咗兩個首映禮，兩部電影都同上咗年紀嘅女人有關。

鬍鬚曾舊年推出預算案後，瞬間被市民叫做史上最廢財爺，因為預算案嘅內容實在太爛，畀市民鬧爆之後又亂派錢，但冇人多謝佢，因為佢做嘢完全冇道理冇原則，攞啲公帑嚟亂咁fing，又唔能夠紓解民困。不過今年就唔同嘞，佢趁早宣讀預算案，避開咗特首選舉，總之就暫時唔喺風眼中，印印腳等收工。不過佢唔好咁老定，事關立法會本月就預算案投票，到時難保議員嘅注意力唔會又去番佢身上。話晒負責管理公帑，市民同議員當然金睛火眼（目及）實佢。到時又睇吓邊個做主角嘞！