政壇：政助贏定向賽因太得閒？
煲呔曾政治僭建問責制請番嚟嘅政治助理，不嬲畀人感覺冇乜功績之餘人工仲特別高，但佢哋尋日竟然可以喺無國界醫生野外定向比賽中奪冠，唔通係因為平時好多時間練習？
參加名人邀請賽嘅四位政治助理包括保安局盧奕基、教育局楊哲安、民政事務局徐英偉同特首辦陳岳鵬，佢哋喺短短兩個半鐘頭內跑得最多check point，最後仲攞到冠軍。陳岳鵬話尋日天氣唔係算好，間中又落咗少少雨，活動完全令佢哋體驗到前線醫生嘅辛勞。
班立法會議員真失威嘞。玩開長跑嘅梁耀忠雖然表現輕鬆，但隊友馮檢基不但要扶住啲樹嚟行，隻腳之後仲抽埋筋，搞到遲咗半個鐘先返到終點。喺咁嘅情況下，阿忠惟有幫手出貓，預先跑去下一個check point拍卡，等啲隊友可以跑少啲路。
盧奕基（左起）、楊哲安、陳岳鵬同徐英偉野外定向好齊心。