政壇：香港重回貪腐年代

香港號稱廉潔城市，廉政公署更打過唔少大老虎，成功將七十年代貪污成風嘅香港擺入歷史書櫃。香港，好在有ICAC。但不知廉恥貪盡大小便宜嘅「貪曾」煲呔曾，為一己私欲將本港嘅珍貴廉潔制度徹底破壞，令香港廉潔程度大倒退，落得如斯田地，七百萬人要「多得」煲呔曾呢個香港第一大貪官，搞到香港行路打倒褪。　人民力量嘅立法會議員「大舊」陳偉業不齒「曾濫權」近日的連番貪腐醜行，尋日佢喺香港電台嘅節目《給香港的信》力數佢嘅不是。大舊話今年係香港回歸十五周年，但實在唔值得慶祝，因為今年係最醜陋嘅一年，唔止特首選舉互揭陰私，估唔到香港維持咁多年嘅廉潔制度，一個唔該畀煲呔曾打爛咗。

阿松冇犯法照下台

佢話煲呔曾作為特首，做過四十幾年公務員，冇可能唔知道乜嘢叫「比白紙更白」，又批評煲呔曾道歉時完全冇誠意，更將責任推卸畀七百萬市民，話係市民道德標準提高咗，咁講法即係毫無悔意，唔止係對唔住十六萬公務員，更陷七百萬市民於不義。

佢仲話如果睇番以往例子，就知道煲呔曾冇可能唔辭職。好似○三年時任財爺嘅梁錦松偷步買車，當時都冇犯法，但阿松喺各界施壓下，最終都要下台辭職，如果煲呔曾一句「無犯法」就為自己開脫，絕對視問責制如無物，將港人賴以自豪嘅廉潔制度徹底粉碎，真係要多得呢個煲呔曾。

香港廉潔制度得來不易，大舊話因為中國人從封建制度開始，已熟習貪贓枉法，就算滿清政府被推翻後，國民黨仍然受貪腐影響，而最貪腐嘅共產黨當然係「貪中之貪」，不能不提。所以香港作為中國城市之一，能夠建立有高效監察性嘅廉潔制度，絕對唔係天跌落嚟，而係靠每一個港人雙手自強不息，屢次向貪腐說不而爭取返嚟。

亦係因為香港有廉潔呢把寶刀，至令香港能夠同其他內地城市完全唔同，就算上海、深圳近年經濟如何起飛，始終追唔上香港嘅廉潔同司法制度。所以大舊呼籲市民，唔應該再容忍煲呔曾呢個貪官，要坐言起行，履行公民責任向政府說不，以行動保衞港人核心價值。