官民矛盾惡化 民怨一觸即爆

不得不承認，唐英年強項極多，唔止係醜聞專家，更加係笑話大王。佢有一單經典笑話，今日重溫，令人特別回味無窮。

話說○九年喎，時任政務司司長嘅唐唐為政改方案上立法會解畫，被議員狠批現行制度搞到香港官民矛盾、不公不義，港府強推爛方案，係咪要強化呢啲社會問題先？唐唐嘅答案精彩咯，佢以一貫招牌傻仔笑容回應：「答案好簡單，係！」全場被佢嚇到目瞪口呆，唐氏笑話大全從此又添一例。

太一叮舊事重提，皆因發現唐唐嘅失常言詞極可能帶有神秘詛咒力量。嗱，東涌纜車被佢唸完「昂坪衫碌鈴」之後，從此事故頻生，永無寧日。同樣，佢話要強化社會矛盾，結果又畀佢講中，叮！

中大最新民調顯示，大部分受訪者認為本港並非和諧社會。其中「官民矛盾」更首次升至三大社會矛盾位置，緊隨「市民與大財團矛盾」同「貧富矛盾」之後。民調機構指出，「官民矛盾」自○八年後嚴重惡化。

調查亦顯示，有兩成半受訪者相信，惟有用激烈手法，先至能夠令港府回應訴求。睇番○八年，即係立法會爆唐氏笑話之前，人數係兩成一，同「官民矛盾」一樣，四年間人數節節上升。四分一受訪者，以七百萬人計算，即係一百七十萬人認同激烈抗爭，唔講得笑o架！

唐唐一語成讖，香港官民矛盾不斷惡化，除咗烏鴉嘴建功，佢同曾蔭權親力親為，一手一腳激化社會仇官、仇富情緒，更加係功不可沒。煲呔曾有連串「曾商勾結」貪腐醜聞，唐唐就爆出僭建地下王宮風暴，貪婪腐敗真面目原形畢露。港府一哥同前二哥都係無恥之徒，升斗市民有乜可能唔深惡痛絕？香港又有乜可能唔官民矛盾嚴重惡化？

叮佢個鎯鎯，最令人火滾嘅係，唐唐民望衰到貼地，三百幾個選委居然仲漠視民意提名佢參選特首，呢班小圈子權貴清一色來自工商界，咁即係擺明官商勾結，挑釁港人嘅啫！

咪話太一叮唔提醒，香港民怨不斷累積，就好似一觸即爆嘅火藥桶。如果特首選舉違逆民意，畀一條淪為人民公敵嘅口臭茂里上台，香港暴動都似，到時香港真係應咗唐唐嗰句：車毀人亡都有之！

咁啦，解鈴還須繫鈴人，如果唔想官逼民反，煲呔曾同唐唐諗諗佢啦，一個提早腳痛落台，一個喺特首選戰自動消失，等香港人下番啖氣，官民矛盾或者可以降番啲嘅，叮！