政壇：政商定格：社企開幕張建宗申報利益
東華三院旗下社會企業愛烘焙餐廳（iBakery Gallery Cafe）喺添馬艦試業咗一排，尋日正式開張大吉，勞工及福利局局長張建宗喺致辭時笑笑口話要申報利益，事關官員甚少為食肆主持開幕，但呢間餐廳就例外，因為係民商官共同參與，而且又係政府總部嘅亮點，所以點都要支持吓喎，好似暗寸煲呔曾攞着數冇申報利益咁。
東華候任主席Viola陳文綺慧都係餐廳嘅常客，原來佢胃口都唔細，每次幫襯都食盡前菜、餐湯、兩個意粉加一個薄餅，但平時唔多做運動，睇落依然咁苗條，真係恨死一眾女士。副主席何超蕸鍾意同朋友去high tea，食件香濃嘅朱古力曲奇配花茶。總理李鋈麟就對cupcake讚不絕口，另一總理馬陳家歡愛歎藍莓芝士蛋糕。
張建宗致辭時笑笑口暗寸煲呔曾攞着數無申報利益。左為陳文綺慧、右為何超蕸。
總理馬陳家歡最愛食芝士嘅甜品。